„I recorc dl infanzia, nosta bela contrada, la familia y nosta patria portun dagnora tl cör, bel anfat olache an é.“
— Daniel Alfreider

Infanzia

Da crësce sö a Corvara, ai albü la poscibilité da passé gran pert di dis de mia infanzia ala leria, tla natöra. Chësc atacamënt ala natöra incomparabla dles Dolomites, che i a albü la poscibilité da imparé da aprijé bele da pice insö, sides a ciasa che sön le lüch de mi neni, conservëi al dedaincö tres ciamó.

Jonëza

Da crësc sö a Calfosch amesa les munts a 1700 m., ai albü la poscibilité da passé tröp tëmp alaleria canche i ê jonn. Te mi agn a scora, sciöche capotlassa, ai imparé da me porvé da porté inant idees nöies y da me dé da fá por el bëgn dl grup. Tres mia pasciun por le sport, dandadöt por i sporc de scuadra sciöche le jüch dal palé o le hockey, ai atira capí tan important che al é da tigní adöm te na scuadra. Dal momënt che nosc paisc é scialdi stlüt fora, ai atira capí la importanza di colegamënc por i raiuns rurai. Ma por meso de bugn colegamënc vara da ti dè les medemes poscibilités ince ala jënt che vir te periferia. 

Stüdi

Do la conclujiun de mi stüdi pro le lizeum scientifich da La Ila, ai studié da injinier zivil pro la université tecnica de Minca. Suzessivamënter ai stlüt jö en Master sön le dërt y tecniches di apalc publics a Roma. 


„ Da nüsc mituns messunse imparé indô da somié. Y messun vire, porvan da realizé chisc sonns.“
— Daniel Alfreider

Familia

Tl ann 2005 ai conesciü mia fomena Manuela. Tl ann 2009 se unse maridé y aldedaincö unse dui mituns: Luca y Paul. Abitun a Cafosch, olache i passi la maiú pert de mi tëmp lëde. Ince ti ultimi agn segná da tröc impëgns é la vijinanza a mia familia stada por me la cossa plü importanta. Sté cun mia familia ô ince dì de avëi en post de retrata y tl medemo tëmp ciafé en gran sostëgn. 

Mistier

La culminaziun de mia cariera profescionala, apert dla politica, é dessigü sté mi laur da injinier zivil pro le proiet dl tunel dl Prener. Aladô de mi percurs de stüdi y de mia storia é sté chësc mi post de laur otimal. Lauré te na scuadra internazionala por la realisaziun de en proiet de dimensciuns tan granes, che se svilupëia danter Südtirol y Nordtirol y che nes dëida da mioré sides i coliamënc de nosc raiun, che la cualité de vita de nosta popolaziun, me á dessigü porté de gran sodesfaziuns. 

Hobbies

Te mi tëmp lëde me sal dër bel da jí sö por munt cun mia familia y mi amisc. Nostes munts, les Dolomites, nes ofrësc ia por döt l’ann dër tröpes poscibilités da sun sciampé dala vita da vigni dé, pur ejëmpl: jí sö pur munt, arpizé, jí cun i schi.

“La regiun europeica dl Tirol é por nos abitanc de Südtirol na gran ocajiun“
— Daniel Alfreider

Motivaziun

Sciöche abitant de Südtirol y zitadin dl’Europa sunsi convinto che an dess lauré inant dé por dé por na Europa dles regiuns. Bel avisa sciöche abitanc de Südtirol podunse ti la fá, fajon nüsc compic y tignon adöm.